اتوار، 22 نومبر 2026 رابطہ English
ڈان پاکستان
بریکنگ

آٹے اور گندم کی قیمتوں کو روکنے کے لئے نجی شعبہ کو فوری طور پر گندم درآمد کرنے کی اجازت دی جائے، خلیق الرشد کا حکومت سے مطالبہ

گندم پالیسی مارکیٹ کے اصولوں کے مطابق بنائی جائے، فلور ملز کے درمیان مسابقت کو فروغ دیا جائے: خلیق ارشد

آٹے اور گندم کی قیمتوں کو روکنے کے لئے نجی شعبہ کو فوری طور پر گندم درآمد کرنے کی اجازت دی جائے، خلیق الرشد کا حکومت سے مطالبہ

لاہور: پاکستان فلور ملز ایسوسی ایشن کے پروگریسو گروپ کے رہنما خلیق ارشد نے حکومت پر زور دیا ہے کہ گندم اور آٹے کے شعبے میں مصنوعی قیمت کنٹرول اور غیر ضروری مداخلت ختم کرکے مارکیٹ کے طلب و رسد کے اصولوں کو اپنایا جائے، جبکہ کم آمدنی والے طبقے کو عمومی سبسڈی دینے کے بجائے براہِ راست ریلیف فراہم کیا جائے۔

انہوں نے یہ بات ایگریکلچرل جرنلسٹس ایسوسی ایشن (AJA) کے ایک وفد سے گفتگو کرتے ہوئے کہی۔ انہوں نے کہا کہ ماضی میں گندم کی دستیابی بہتر ہونے پر آٹے کے تھیلے کی قیمت 2,800 روپے سے کم ہو کر 1,300 روپے تک آگئی تھی، جو حکومتی قیمت کنٹرول کے بجائے طلب اور رسد کے اصولوں اور فلور ملز کے درمیان مسابقت کا نتیجہ تھا۔

خلیق ارشد نے کہا کہ حکومت کی جانب سے کبھی راشننگ، کبھی کوٹہ سسٹم اور کبھی گندم کی خریداری و اجرا کی پالیسی تبدیل کرنے سے مارکیٹ میں غیر یقینی صورتحال پیدا ہوئی ہے۔ خریداری کے عمل میں وقفے اور بعد ازاں قیمتوں میں اضافے پر کیپ لگانے سے کسانوں کو مناسب قیمت حاصل کرنے کا موقع نہیں ملا، جس سے آئندہ فصل کے لیے ان کی حوصلہ افزائی بھی متاثر ہوتی ہے۔

انہوں نے کہا کہ حکومت کو گندم کی خریداری کے لیے 4,500 روپے فی من قیمت مقرر کرنے پر سراہا جانا چاہیے کیونکہ یہ کاشتکاروں کے لیے ایک اچھا مالی ترغیب ہے، تاہم فلور ملوں کو گندم جاری کرتے وقت اس کی اصل خریداری قیمت کے ساتھ اسٹوریج، ٹرانسپورٹیشن اور دیگر اخراجات بھی شامل کرکے مارکیٹ کے مطابق نرخ مقرر کیے جائیں۔ اگر حکومت مہنگی گندم خرید کر اسے کم قیمت پر جاری کرے گی تو مارکیٹ میں قیمتوں کا فرق مزید مسائل پیدا کرے گا۔

خلقیق ارشد کے مطابق  حکومت کو آٹے پر عمومی سبسڈی دینے کے بجائے غربت کی لکیر سے نیچے زندگی گزارنے والے اور کم قوت خرید رکھنے والے خاندانوں کو ہدفی سبسڈی فراہم کرنی چاہیے۔ اس مقصد کے لیے کسان کارڈ، بے نظیر انکم سپورٹ پروگرام اور پنجاب حکومت کے دیگر سماجی معاونت کے پروگراموں کے ڈیٹا سے استفادہ کیا جا سکتا ہے تاکہ سرکاری وسائل حقیقی مستحقین تک پہنچ سکیں۔

خلیق ارشد کے مطابق آٹے پر عمومی سبسڈی کا فائدہ غریب مزدور سے لے کر صاحب استطاعت طبقے تک سب کو ملتا ہے، حالانکہ مہنگے ہوٹلوں میں کھانا کھانے اور مہنگی گاڑیوں میں سفر کرنے والے افراد کو سستی روٹی فراہم کرنے کا کوئی معاشی جواز نہیں۔ سبسڈی صرف ان لوگوں کے لیے ہونی چاہیے جن کی قوت خرید محدود ہے۔

انہوں نے حکومت کو ایک اسٹریٹجک گندم ریزرو قائم رکھنے کی تجویز دیتے ہوئے کہا کہ قلت یا قیمتوں میں غیر معمولی اضافے کی صورت میں اس ذخیرے سے گندم مارکیٹ کے مطابق نرخوں پر جاری کی جائے تاکہ دستیابی یقینی بنائی جا سکے، نہ کہ مارکیٹ میں مصنوعی طور پر قیمتیں کم رکھنے کے لیے۔

انہوں نے غیر فعال فلور ملوں کو بھی لازمی کوٹہ دینے کی پالیسی پر نظرثانی کا مطالبہ کیا اور کہا کہ فلور مل قائم کرنا ایک نجی کاروباری فیصلہ ہے، لہٰذا حکومت کی ذمہ داری نہیں کہ وہ غیر فعال ملوں کو چلانے کے لیے سہارا فراہم کرے۔ گندم کی فراہمی فعال ملوں کو ان کی کارکردگی اور مارکیٹ کی مسابقت کی بنیاد پر ہونی چاہیے۔

خلیق الرشد نے واضح کیا کہ حکومت کی موجودہ پالیسی میں تضاد ہے کیونکہ ایک طرف مارکیٹ کو آزاد کرنے کی بات کی جاتی ہے جبکہ دوسری جانب قیمتوں، گندم کی فراہمی اور آٹے کی فروخت کو کنٹرول کیا جاتا ہے۔ حکومت کو واضح پالیسی اختیار کرنی چاہیے تاکہ کاروباری طبقہ غیر یقینی صورتحال سے نکل سکے۔

فلور ملوں کو سبسڈائزڈ گندم کی فراہمی کے طریقہ کار پر بات کرتے ہوئے انہوں نے کہا کہ اس وقت بعض بڑے شہروں میں تقریباً 3,700 روپے فی من کے حساب سے سرکاری گندم فراہم کی جا رہی ہے جبکہ مارکیٹ میں گندم کی قیمت تقریباً 5,400 روپے فی من ہے۔ اس کے عوض ملوں کو گرین تھیلے میں آٹا فراہم کرنا پڑتا ہے، تاہم ان سے یہ بھی توقع کی جاتی ہے کہ وہ اپنی مہنگی گندم سے تیار ہونے والے آٹے کا تقریباً 20 سے 25 فیصد حصہ بھی کم سرکاری نرخوں پر فراہم کریں۔

انہوں نے کہا کہ اس پالیسی سے فلور ملوں کو مسلسل مالی نقصان برداشت کرنا پڑ رہا ہے۔ حکومت کو چاہیے کہ اس شرط کو واپس لے اور ملوں سے صرف اسی تناسب سے آٹا حاصل کرے جس تناسب سے انہیں سبسڈائزڈ گندم فراہم کی جاتی ہے۔ فلور ملیں مقررہ مقدار میں آٹا فراہم کرنے کے لیے تیار ہیں، تاہم ان پر اضافی مالی بوجھ نہیں ڈالا جانا چاہیے۔

متعلقہ خبریں

تبصرے (0)